Gecələrim uzun çəkir,
İşığımda sönüb gəlmə.
Qəm gölüyəm, nazlı sonam,
Sevincini bölüb gəlmə.
Bu ayrılıq uzun çəkdi,
Ürəyimə hicran əkdi,
İndi düşmənim gülməkdi,
Gülməz üzüm, gülüb gəlmə.
Sən əlimi ötürəndən,
Mən yolumu itirəndən,
Bu can təkliyi sevəndən,
Yalquzağa dönüb, gəlmə.
Yaranmışdı bu eşq yoxdan,
Qismətimə düşdü baxtdan,
Sən tanıyan Vahid çoxdan
Sən gedəndən ölüb, gəlmə.